नेरळ शहरात एकाच रात्रीत सात घरफोड्या; ग्रामस्थांच्या मदतीने सराईत चोराच्या पोलिसांनी आवळल्या मुसक्या

कर्जत (गणेश पवार) : 

नेरळ शहरात एकाच रात्रीत सात घरफोड्या आणि दुकाने फोडणाऱ्या सराईत गुन्हेगार चोरट्याला स्थानिक ग्रामस्थांच्या मदतीने नेरळ पोलिसांनी हातात बेड्या ठोकल्या आहेत. २७ वर्षीय मोहम्मद फिरोज नईम अहमद खान असे या आरोपीचे नाव असून तो कल्याण येथील राहणारा आहे. शुक्रवार 7 फेब्रुवारी रोजी रात्री दीड वाजण्याच्या सुमारास या चोरट्याने नेरळ शहरात धुमाकूळ घातला होता. चार घरे तर एक मंदिर तर दोन दुकाने या चोरट्याने फोडून लुटली होती. दरम्यान जागरूक ग्रामस्थांच्या मदतीने या चोरट्याला पकडण्यात नेरळ पोलिसांना यश आले.

नेरळ पोलीस ठाणे हद्दीत येत असलेल्या नेरळ शहरातील ब्राह्मणआळी, जुनी बाजारपेठ येथील श्री रामाचे मंदिर तर मुख्य बाजारपेठ येथील चहाचे दुकान व ऍडव्होकेट यांचे ऑफिस त्याच सोबत नेरळ पूर्व परिसरातील साई मंदिर परिसरातील मेडिकल दुकान आणि निर्माण नगरी परिसरातील डिझाईन पार्थ बिल्डिंग येथील इमारतीतील बंद घरे या चोरट्याने लुटली होती. केवळ लोखंडी कटावणी आणि स्क्रू ड्रायव्हर या दोन साहित्याचा वापर करून सराईत आरोपी चोरट्याने घरे आणि दुकाने असे सात घरांचे टाळे फोडून लुटली होती. दुकान व घरे लुटून पैसे चोरून चोर फरार होत असताना ग्रामस्थांनी पकडले असून नेरळ पोलीस तात्काळ घटनास्थळी दाखल होत चोरट्यास ताब्यात घेण्यात आले होते. यावेळी चोरट्याकडून १५ हजार रुपये नेरळ पोलिसांनी हस्तगत करीत लोखंडी कटावणी व स्क्रू ड्रायव्हर साहित्य ताब्यात घेतले आहे.

————————————–

सिक्युरिटी गार्ड सांगताच चोर फसला आणि ग्रामस्थांच्या तावडीत सापडला.

डिझाईन पार्थ बिल्डिंग इमारतीतील चोरी करण्यासाठी शिरलेल्या चोरट्याला येथील ग्रामस्थांनी विचारणा केली असता चोरट्याने आपण सिक्युरिटी गार्ड असल्याचे सांगितले, परतू आमच्या इमारतीत सिक्युरिटी गार्ड ठेवलाच नसल्याचे ग्रामस्थांनी सांगताच चोर पळून जावून झाडांच्या झुडपात लपला परतू जागरूक नागरिकांनी त्याला मोठ्या शिताफीने पकडुन नेरळ पोलिसांच्या ताब्यात दिले.