नागोठणे पत्रकार संघाच्या मागणीची सा.बां. मंत्र्यांनी घेतली दखल

नागोठणे ( महेंद्र माने) :

बापुसाहेब देशपांडे विद्यासंकुलसमोर उभारलेला अरूंद गैरसोयीच्या पुलाबाबत नागोठणे पत्रकार संघाने केलेल्या मागणीची सार्वजनिक बांधकाम मंत्री शिवेंद्रसिंह राजे भोसले यांनी गुरुवार 20 फेब्रुवारी रोजी मुंबई गोवा राष्ट्रीय महामार्गाची करण्यात आलेल्या प्रत्यक्ष पाहणी दौर्‍यात दखल घेतली. यावेळी चुकीच्या पूलाबाबत नाराजी व्यक्त करीत संबंधित अधिकार्‍यांना पर्यायी व्यवस्था करण्याचे आदेश दिले आहेत. यावेळी खा. धर्यशील पाटील हे यांच्या समवेत होते.

मुंबई गोवा महामार्गावरील अपूर्ण कामाची प्रत्यक्ष पाहणी करण्यासाठी राज्याचे सार्वजनिक बांधकाम मंत्री शिवेंद्र राजे भोसले यांनी 20 फेब्रुवारी रोजी रायगड आणि रत्नागिरी जिल्हा दौऱ्याचे आयोजन केले होते. त्यामध्ये पनवेल येथील पळस्पे ते इंदापूर या टप्यात महामार्गावरील प्रत्यक्ष सुरु असलेली कामे, त्यामध्ये होत असलेली दिरंगाई, जमीन हस्तांतरणात येत असलेल्या अडचणी याबाबत पाहणी करत असताना नागोठणे पत्रकार संघाचे अध्यक्ष उदय भिसे,सदस्य नारायण म्हात्रे यांच्यासह सर्व पदाधिकार्‍यांनी ना. राजे भोसले यांची देशपांडे विद्यासंकुलासमोर नव्याने बांधण्यात आलेल्या पूलाच्या ठिकाणी भेट घेतली.

यावेळी नव्याने बांधलेला गैरसोयीचा धोकादायक पूल हा अरुंद, चुकीच्या ठिकाणी उतरविणे यासारख्या अनेक समस्यांची माहिती उदय भिसे व नारायण म्हात्रे यांनी देत याबाबत नागोठणे पत्रकार संघाने विद्यार्थी व नागरिकांच्या हितासाठी लढा उभारला असल्याचे सांगितले. त्या आशयाचे एक मागणी पत्र ना. मंत्री महोद्यांना दिले. यावेळी चुकीच्या पध्दतीने बांधण्यात आलेल्या पूलाबाबत ना. मंत्री महोद्यांनी नाराजी व्यक्त केली. तसेच सदरील मागणी पत्राची तातडीने दखल घेत संबंधित अधिकार्‍यांना लवकरात लवकर पर्यायी व्यवस्था करण्याचे आदेश दिले.