नागोठणे नगरीत होणार हरी नामाचा गजर… चार दिवस हरिनाम सप्ताह व दिंडी सोहळ्याचे आयोजन

नागोठणे ( महेंद्र माने) :

संत सेवा मंडळ यांच्या विद्यमाने ज्ञानेश्वर मंदिर येथे फाल्गुन शुद्ध तृतीया रविवार 02 मार्च ते षष्टी बुधवार 05 मार्च दरम्यान अखंड हरिनाम सप्ताहाचे व दिंडीचे आयोजन करण्यात आल्याने चार दिवस नागोठणे नगरीत हरी नामाचा गजर होणार आहे.

हरिनाम सप्ताह या धार्मिक कार्यक्रमात दररोज पहाटे 4.00 ते 06 वा. काकड आरती,सकाळी 8.30 ते 12.30 वा. व 2.00 ते 4.30 वा.पर्यंत ज्ञानेश्वर ग्रंथाचे पारायण,सायं. 5.00 ते 6.00 वा. पर्यंत प्रवचन 6.00 ते 7.30 वा. नागोठणे पंचक्रोशी व विभागाचे हरिपाठ,रात्री 9.00 ते 11.30 वा. कीर्तन त्यानंतर भजन व हरी जागर करण्यात येणार आहे. तसेच दररोज सकाळी चहा व अल्पोहार,सायंकाळी चहा, दुपारी व रात्री महाप्रसादाचे आयोजन करण्यात आले.

यामध्ये रविवार 02 मार्च रोजी वादोंळी येथील ह.भ.प.दिनेश महाराज कडव यांचे प्रवचन, रात्री ह.भ.प. नित्यानंद महाराज मांडवकर यांचे कीर्तन,सोमवार 03 मार्च रोजी वणी येथील ह. भ. प. विठोबा मांडलुस्कर यांचे प्रवचन, रात्री धोंडसे –पाली येथील ह.भ.प.किरण महाराज कुंभार यांचे कीर्तन,मंगळवार 04 मार्च रोजी ह.भ.प. विजय महाराज शहासने यांचे प्रवचन, रात्री श्रीक्षेत्र देवाची आळंदी येथील ह.भ.प. तुकाराम महाराज शिंदे यांचे कीर्तन,बुधवार 05 मार्च रोजी सकाळी 9.30 ते 11.30 वा. पर्यंत पंढरपूर येथील गुरुवर्य ह.भ.प. नारायण महाराज वाजे,अलिबागकर महाराज यांचे काल्याचे कीर्तन आयोजन केले असल्याची माहिती संत सेवा मंडळाने दिली असून सदरील प्रवचन व कीर्तन या धार्मिक कार्यक्रमाचा लाभ शहर व विभागातील भक्तांनी घेण्याची विनंती शेवटी मंडळाने केली आहे.