नागरिकांची स्वच्छतेबाबतीत मानसिकता नसल्यामुळे घाणीचे साम्राज्य; स्वच्छता विभागाचे दुर्लक्ष

माथेरान ( मुकुंद रांजणे ) : 

माथेरान मधील काही भागातील नागरिकांची स्वच्छता बाबतीत मानसिकता नसल्यामुळे त्या त्या भागात घाणीचे साम्राज्य पसरले असून अभ्यासू , सुशिक्षित नागरिकांच्या आरोग्यास धोका निर्माण होण्याची शक्यता निर्माण झाली आहे. नगरपरिषदेमार्फत नियमितपणे कचरा वेचक महिला कचरा संकलन करण्याचे काम निमितपणे करीत असतात. परंतु काही नागरिक जाणून-बुजून आपल्या जवळील ओला सुका कचरा आजूबाजूच्या गटारात फेकत असल्यामुळे त्या त्या भागात दुर्गंधी पसरलेली असून घाणीचे साम्राज्य दिसून येत आहे.

गावातील अनेक ठिकाणी घरगुती लॉजिंग पर्यटकांच्या सेवेसाठी उपलब्ध आहेत त्या लॉजिंग मधील प्लास्टिक बाटल्या तसेच अन्य कचरा नियमितपणे  येणाऱ्या कचरा वेचक महिलांकडे न देता काहीजण बाजूच्या गटारात टाकत असल्यामुळे यावर तोडगा काढण्यासाठी आणि जे अस्वच्छता राखत आहेत यांना वठणीवर आणण्यासाठी ज्याप्रमाणे गावातील मुख्य रस्त्यांवर सीसीटीव्ही कॅमेरे बसविले आहेत त्याचप्रमाणे नगरपरिषदेने वस्तीच्या ठिकाणी जागोजागी सीसीटीव्ही कॅमेरे बसवणे गरजेचे बनले आहे.

त्यामुळे जो कोणी कचरा गटारात टाकेल त्यांच्यावर स्वच्छता विभागामार्फत दंडात्मक कारवाई करता येऊ शकते. काही नागरिकांनी आपल्या घरातील शौचालयासाठी सेफ्टी टॅंक बांधलेले नसल्यामुळे शौचालयाचा पाईप थेट गटारात सोडल्याने सर्व घाण त्या गटारात पडत असते त्यामुळे सफाई कामगारांना या दुर्गंधीमुळे स्वच्छता करणे खूपच कठीण बनलेले आहे. स्वच्छता विभागाच्या अधिकाऱ्यांनी नियमितपणे गावात फेरफटका मारून पाहणी करणे आवश्यक असल्याचे सुज्ञ नागरिकांमधून बोलले जात आहे.