नवी मुंबई विमानतळावर पहिलं व्यावसायिक विमानाचं यशस्वी लँडिंग; मार्च 2025 पासून प्रवाशांसाठी होणार सुरू

पनवेल : 

मुंबई छत्रपती शिवाजी महाराज आंतरराष्ट्रीय विमानतळावरील भार कमी करण्यासाठी उभारण्यात आलेल्या नवी मुंबई आंतरराष्ट्रीय विमानतळावर आज (29 डिसेंबर) दुपारी 1:30 वाजता इंडिगो A-320 या व्यावसायिक विमानाचं यशस्वी लँडिंग करण्यात आलं. यापूर्वी झालेल्या चाचणी लँडिंगनंतर हे विमानतळावरचे पहिले व्यावसायिक लँडिंग ठरले. या यशस्वी लँडिंगनंतर विमानाला पाण्याची सलामी देण्यात आली.

सुमारे 5,945 एकरांवर उभारण्यात आलेलं हे विमानतळ मार्च 2025 पासून कार्यान्वित होणार आहे. हे देशातील दुसऱ्या क्रमांकाचं मोठं विमानतळ असून वर्षाला 9 कोटींहून अधिक प्रवाशांची सोय होऊ शकते. 3.7 किमी लांब रन वे आणि 350 विमाने थांबण्याची क्षमता असलेल्या या विमानतळावर भारतातील सर्वात मोठी कार्गो प्रणाली तयार करण्यात आली आहे.

सिडको आणि जीव्हीके यांच्या संयुक्त विद्यमाने बांधण्यात आलेल्या या विमानतळाने मुंबईपासून 40 किमी अंतरावरील पनवेल येथे स्थान मिळवलं आहे. रन वे, सिग्नल यंत्रणा यांसह जवळपास सर्व महत्त्वाची कामे पूर्ण झाली असून विमानतळ लवकरच प्रवाशांसाठी खुलं होणार असल्याचे समजते.