तलाठी व मंडळ अधिकारी लाच घेताना रंगेहात पकडले; महाड महसूल विभागात खळबळ

महाड( मिलिंद माने) : 

वरंडली (ता. महाड) येथील जमिनीच्या खरेदीखताची नोंद सातबाऱ्यावर करण्यासाठी तीन हजार रुपयांची लाच घेत असताना तलाठी आणि मंडळ अधिकारी यांना लाचलुचपत प्रतिबंधक विभागाच्या अलिबाग येथील पथकाने रंगेहात पकडले. ही कारवाई महाड शहरात करण्यात आली असून महसूल विभागात एकच खळबळ उडाली आहे.

तक्रारदार यांनी वरणडोली येथे सर्वे नंबर २९८ मधील ०.२२२० हेक्टर क्षेत्र ११ फेब्रुवारी २०२५ रोजी खरेदी केले होते. या खरेदीखताची नोंद सातबाऱ्यावर करण्यासाठी त्यांनी तलाठी सुरज मोहनलाल पुरोहित (सजा चापगाव – अतिरिक्त कार्यभार) यांच्याकडे अर्ज केला होता. मात्र, त्यांनी यासाठी तीन हजार रुपयांची लाच मागितली होती.

तक्रारदाराच्या तक्रारीवरून अलिबागच्या लाचलुचपत प्रतिबंधक विभागाचे निरीक्षक एस. व्ही. भिसे यांच्या पथकाने ही कारवाई केली. तलाठी पुरोहित आणि मंडळ अधिकारी भगवान तेजराव मोरे (मंगरूळ – अतिरिक्त कार्यभार नाते मंडळ) यांना लाच घेताना रंगेहात पकडण्यात आले असून, त्यांच्या विरोधात महाड शहर पोलीस ठाण्यात गुन्हा दाखल करण्यात आला आहे.