ज्येष्ठ नागरिक संघाच्या एकपात्री प्रयोग अन् मोतीबिंदू शस्त्रक्रिया उपक्रमांना चांगला प्रतिसाद

पोलादपूर (शैलेश पालकर) :

पोलादपूर तालुका ज्येष्ठ नागरिक संघाच्या एकपात्री प्रयोग आणि मोतीबिंदू शस्त्रक्रिया उपक्रमांना ज्येष्ठ नागरिक संघाचे सदस्य महिला पुरूषांचा उत्स्फूर्त प्रतिसाद मिळाला. संघाच्या संस्थापक अध्यक्षा कांचन शरद बुटाला यांनी श्रीस्वामी समर्थ मठामध्ये या उपक्रमांचे आयोजन केले.

असा मी असामी या पु.ल.देशपांडे यांच्या पुस्तकावर आधारित व्यक्तीरेखांचे सादरीकरण मराठी मालिकांतील अभिनेते सुबोध चितळे यांनी केले. यावेळी पु.ल.देशपांडे यांच्या व्यक्ती आणि वल्ली मधील अंतूबरवा हे पात्र देखील सुबोध चितळे यांनी प्रेक्षकांसमोर साकारले. यावेळी विनोदी व्यक्तीरेखांचे भन्नाट सादरीकरण पाहताना ज्येष्ठ नागरिकांची हसून हसून मुरकुंडी वळली.

यानंतर डॉ. पटवर्धन यांच्या नंदादीप नेत्रालयातर्फे मोफत नेत्रतपासणी करण्यात येऊन मोफत मोतीबिंदू शस्त्रक्रिया तपासणीसाठी ज्येष्ठ नागरिकांसह पोलादपूर शहरातील नेत्ररूग्णांनी नोंदणी केली. संघाच्या संस्थापक अध्यक्षा कांचन शरद बुटाला यांनी सुरूवातीला ज्येष्ठ नागरिकांनी वयाचा बाऊ न करता आपल्या कलागुणांना वाव देण्यासाठी सादरीकरण करण्याची गरज व्यक्त करून रेकॉर्ड डान्स सादर केला.

कार्यक्रमाचे सूत्रसंचालन स्वामी सेवक अथर्व बुटाला यांनी केले.