जालना जिल्ह्यातील सहलीचे 18 विद्यार्थी पोलादपूरच्या ग्रामीण रूग्णालयामध्ये दाखल

पोलादपूर ( शैलेश पालकर ) :

जालना जिल्ह्यातील विद्यार्थ्यांची सहल आंबेनळी घाटातून पोलादपूरकडे येत असताना बसमधील 18 विद्यार्थ्यांची प्रकृती अचानक ढासळल्याने त्यांना पोलादपूरच्या ग्रामीण रूग्णालयामध्ये दाखल करण्यात आले. जालना जिल्ह्यातील जाफराबाद तालुक्यातील न्यू हायस्कूल वरूळ वाटवणचे हे विद्यार्थी असल्याची माहिती प्राप्त झाली आहे. यावेळी पोलादपूर ग्रामीण रूग्णालयामध्ये प्रभारी वैद्यकीय अधिक्षक नसल्याने येथील आरोग्यसेवा रामभरोसे असल्याचे दिसून आले.

सिध्दटेक, बारामती, जेजूरी, मोरगाव, नारायणपूर, महाबळेश्वरमार्गे ही शैक्षणिक सहलीची बस पोलादपूरच्या दिशेने निघाली. तत्पुर्वी महाबळेश्वर येथे तेलकट पदार्थ खाल्ले तसेच स्ट्रींग नावाचे शाळकरी विद्यार्थ्यांमध्ये आवडते असलेले पेय प्यायले आणि त्यानंतर आंबेनळी घाटात हवेतील गारवा खिडक्यांवाटे बसमध्ये आल्यामुळे बसच्या सर्व खिडक्या बंद करून प्रवास केल्याने गुदमरल्यासारखी भावना होऊन 18 विद्यार्थ्यांना मळमळ होऊन त्यांची प्रकृती अस्वस्थ झाली.

यामुळे पोलादपूर येथे येताच सर्व अस्वस्थ वाटणाऱ्या विद्यार्थ्यांना पोलादपूरच्या ग्रामीण रूग्णालयामध्ये साधारणपणे रात्री 10 वाजण्याच्या सुमारास दाखल करण्यात आले. यावेळी महाड डीवायएसपी शंकर काळे, पोलादपूरचे पोलीस निरिक्षक अनिल जाधव, महाड ग्रामीण रूग्णालयाचे वैद्यकीय अधिक्षक डॉ.शांतनू डोईफोडे, डॉ.अनिल काकड, बालरोगतज्ज्ञ डॉ.कुल्ले, डॉ.राजेश शिंदे तसेच पोलादपूर तहसिल कार्यालयातील काही कर्मचारी यांनी उपस्थित राहून विद्यार्थ्यांवरील उपचारांना प्राधान्य दिले.

गेल्यावर्षीदेखील पोलादपूर येथील कॅप्टन विक्रमराव मोरे सभागृहालगत सहलीच्या विद्यार्थ्यांना अशाचप्रकारे स्ट्रींग पेय प्राशन केल्याने अस्वस्थ वाटू लागल्याने पोलादपूर ग्रामीण रूग्णालयामध्ये दाखल करण्यात आले होते.

वैद्यकीय अधिक्षकाविना ग्रामीण रूग्णालय

पोलादपूर ग्रामीण रूग्णालयामध्ये गेल्या काही महिन्यांपासून डॉ.भाग्यरेखा पाटील यांची बदली झाल्यानंतर अलिबागचे डॉ.पाटील हे प्रभारी वैद्यकीय अधिक्षक म्हणून काम पाहात असून त्यांची अनुपस्थिती या घटनेवेळी जाणवली. महाड येथील वैद्यकीय अधिक्षक डॉ.शांतनू डोईफोडे हे वीर रेल्वे स्टेशनसमोरील भीषण अपघातानंतर महाड ग्रामीण रूग्णालयामध्ये आलेल्या जखमींवर उपचार करून तसेच मृतदेहांची उत्तरिय तपासणी करून रात्री पुन्हा पोलादपूर ग्रामीण रूग्णालयात विद्यार्थ्यांवर उपचारासाठी उपस्थित राहिले होते.