छत्रपती शिवाजी महाराज व डॉ. बाबासाहेब आंबेडकर जयंती दिवशी “ड्राय डे” घोषित करा : सामाजिक कार्यकर्त्यांची मागणी

PEN न्यूज ऑनलाइन टीम :

महाराष्ट्राचे आराध्य दैवत आणि मराठा साम्राज्याचे संस्थापक छत्रपती शिवाजी महाराज यांची जयंती 19 फेब्रुवारी रोजी संपूर्ण देशात मोठ्या उत्साहात साजरी केली जाते. याचप्रमाणे, भारतीय संविधानाचे शिल्पकार डॉ. बाबासाहेब आंबेडकर यांची जयंतीदेखील 14 एप्रिल रोजी मोठ्या प्रमाणावर साजरी केली जाते. या दोन्ही महापुरुषांच्या जयंतीचा सन्मान राखण्यासाठी आणि कायदा-सुव्यवस्था सुरळीत ठेवण्यासाठी महाराष्ट्र शासनाने या दिवशी “ड्राय डे” जाहीर करावा, अशी मागणी सामाजिक कार्यकर्ते हरिष बेकावडे यांनी केली आहे.

सध्या या दिवशी विविध ठिकाणी शिवजयंती मिरवणुका, सांस्कृतिक कार्यक्रम, शिव व्याख्याने, तसेच गडकिल्ल्यांचे संवर्धन व सजावट यासारख्या उपक्रमांचे आयोजन केले जाते. मात्र, दुसरीकडे, दारूची दुकाने, बार आणि रेस्टॉरंटमधून सर्रास मद्य विक्री होत असते. यामुळे या उत्सवांमध्ये काही अनुचित प्रकार घडण्याची शक्यता असते आणि महापुरुषांचा अपमान होण्याची भीती व्यक्त केली जात आहे. त्यामुळे महाराष्ट्र शासनाने गांभीर्याने विचार करून दोन्ही जयंतीच्या दिवशी दारू विक्रीवर बंदी घालावी, अशी ठाम मागणी करण्यात आली आहे.

ज्याप्रमाणे महात्मा गांधी जयंती (2 ऑक्टोबर), स्वातंत्र्य दिन (15 ऑगस्ट), प्रजासत्ताक दिन (26 जानेवारी), तसेच निवडणूक कालावधीमध्ये “ड्राय डे” पाळला जातो, त्याच धर्तीवर छत्रपती शिवाजी महाराज आणि डॉ. बाबासाहेब आंबेडकर यांच्या जयंती दिवशीही “ड्राय डे” जाहीर करण्यात यावा, अशी भूमिका हरिष बेकावडे यांनी मांडली आहे.

यासंदर्भात मुख्यमंत्री, उपमुख्यमंत्री, मंत्रिमंडळ, खासदार आणि आमदार यांना पत्र पाठवून ही मागणी करण्यात आली आहे. जर शासनाने तातडीने निर्णय घेतला नाही, तर मंत्रालयातील छत्रपती शिवाजी महाराजांच्या फोटोसमोर शांततेच्या मार्गाने मौन व्रत धारण करून आमरण उपोषण करण्याचा इशारा बेकावडे यांनी दिला आहे.

यामुळे महाराष्ट्रातील 288 आमदार, मुख्यमंत्री, उपमुख्यमंत्री आणि संपूर्ण मंत्रिमंडळाला या विषयाची जाणीव होईल आणि छत्रपती शिवाजी महाराजांचे नाव घेऊन राजकारण करणाऱ्या पक्षांनाही योग्य निर्णय घ्यावा लागेल, असा इशाराही त्यांनी दिला आहे. आता या मागणीवर सरकार कोणता निर्णय घेते, याकडे संपूर्ण महाराष्ट्राचे लक्ष लागले आहे.