चोळईत मरिआईदेवी मंदिर जिर्णोध्दार सोहळा; आज, उद्या भरगच्च कार्यक्रमांचं आयोजन

पोलादपूर ( शैलेश पालकर ) :

मुंबई गोवा राष्ट्रीय महामार्गावरील कशेडी घाटातील चोळई या गावातील मरिआईदेवी मंदिराचा जिर्णोध्दार सोहळा बुधवार, दि. 23 ऑक्टोबर ते गुरूवार, दि. 24 ऑक्टोबर 2024 रोजी भरगच्च कार्यक्रमांचे आयोजन करून होणार असल्याची माहिती चोळई ग्रामस्थ मंडळाकडून देण्यात आली.

सदगुरू आनंददादा मोरेमाऊली यांच्या हस्ते श्रीमरीआईदेवीच्या मुर्तीची प्राणप्रतिष्ठा होणाार असून मंदिराच्या वास्तुचे उदघाटन उद्योजक संतोष मेढेकर यांच्याहस्ते होणार आहे तर कलशारोहण ह.भ.प.अजितमहाराज गद्रे यांच्याहस्ते करण्यात येणार आहे.

बुधवारी सकाळी श्रीमरिआई देवीच्या मुर्तीची भव्य मिरवणूक, महाप्रसाद, जलाधिवास, धन्यधिवास, श्रीमरीआईदेवी भजन ग्रामस्थमंडळी चोळई यांच्यातर्फे असे दिवसभराचे कार्यक्रम होणार असून गुरूवारी मंगळपाठ देवांचे आशीर्वाद घेणे, गणेशपूजन पुण्याहवचन, मातृका तसेच ब्राह्ममंडळ शिखादी वास्तूपिठ देवता, नवग्रहादी मंडळ देवता, प्राणप्रतिष्ठा, कलशारोहण, मंदिर उदघाटन, प्रमुख पाहुण्यांचे स्वागत, महाप्रसाद, ओंबळीतील ह.भ.प. लक्ष्मणमहाराज जाधव यांचे प्रवचन, श्रीसंत मोरेमाऊली सांप्रदाय हरीपाठ तसेच सायंकाळी 7 ते 9 वाजेपर्यंत प.पू.सदगुरूदादा महाराज मोरे माऊली यांची किर्तनसेवा असे भरगच्च कार्यक्रम आयोजित करण्यात आले आहेत.

याप्रसंगी रायगड जिल्ह्यातील प्रमुख राजकीय पक्षाचे पदाधिकारी आणि लोकप्रतिनिधींना निमंत्रित करण्यात आल्याची माहिती ग्रामस्थमंडळ चोळई, मुंबई पुणे मंडळ नवतरूण मित्रमंडळ चोळई यांनी दिली आहे.