ग्रामदैवत श्री वाकडाई देवी होळीच्या माळावर मानाच्या होळीला माणगांवकरांची अलोट गर्दी

माणगांव ( रविंद्र कुवेसकर )

माणगांव उतेखोलगांवचे ग्रामदैवत श्री वाकडाई देवी होळीच्या माळावर तमाम माणगांवकरांच्या साक्षीने रविवार दि.२४ मार्च रोजी रात्री ११.०५ वाजता “सोन्याची पालखी नं रुप्याच ठसं! या या पालखींन होम देव बसं!” हे पारंपारिक फाकं गीत गाऊन ग्रामस्थांनी होळीभोवती फेर धरुन जोशपूर्ण वातावरणात चेतविलेल्या धगधगत्या होमात इडा-पिडा अनिष्टप्रवृत्ती अन् वाइटाचे दहन होऊ दे.. सर्वांना चांगले आरोग्य, सुख समृध्दी समाधानी आनंदी आयुष्य लाभू दे ! असा मनी संकल्प करीत श्री वाकडाई देवी चरणी साकडे घालीत तेजःपुंज होळीचे दर्शन घेण्या-साठी माणगांवकरांनी येथे अलोटगर्दी केली होती.

होळी लागल्यानंतर रात्री उशिराने या ठिकाणी ग्रामस्थांनी श्री वाकडाई देवी मंदिरातून श्री वाकडाई व भैरी देवीच्या तसेच बापुजीच्या मुर्तींना पालखीत बसवुन वाजतगाजत भक्तिपूर्ण वातावरणात होळीच्या माळावर आणले आहे. येथील सहानेवर येत्या पंचमी पर्यंत देवी विराजमान झाली आहे. दर्शनासाठी भाविकांची आतापासुन गर्दी सुरु झाली आहे. येत्या गुरुवारी दि.२८ मार्च रोजी सत्यनारायण पुजा येथे होणार असुन शुक्रवार दि.२९ मार्चला माळावर पोस्तचा कार्यक्रम आहे.

होळीला आलेल्या सर्व प्रतिष्ठीत नागरिक, नगरसेवक, लोकप्रतिनीधी सर्व भाविकांचे व मान्यवरांचे येथील उत्सव कमिटी तर्फे हार्दिक स्वागत करण्यात आले. तसेच माणगांव पोलीस ठाण्याचे पोलीस निरिक्षक राजेंद्र पाटील तसेच सहाय्यक पो.नि. भोसले व पोलीस तसेच महिला पोलीस कर्मचारी यांनी देखील रात्री येथे येऊन होळीचे दर्शन घेतले.