गॅस आगीचा भडक्यानं नागोठणे हादरलं ! तिघे होरपळले, लाखो रुपयाच्या सामानाची होळी  

नागोठणे ( महेंद्र माने ) :

खडक आळीतील विलास जोशी यांच्या घरी रविवार 08 डिसेंबर रोजी रात्रीच्या सुमारास घरातील गॅस दुरुस्तीचे काम करीत असताना गॅस सिलेंडर लिक होऊन आग लागल्याने तिघे जण भाजून जखमी झाले आहेत. यावेळी विलास जोशी यांनी प्रसंगावधान राखत गॅस बंद केल्याने मोठा अनर्थ टळला आहे. या आगीत घराचे व मंडप डेकोरेशनचे साधारण 2 लाख 30 हजार रुपयांचे नुकसान झाले आहे.

मिळालेल्या माहितीनुसार, रविवार 08 डिसेंबर रोजी खडक आळीतील विलास जोशी यांच्या घरी त्यांच्या घरातील गॅस योगेश ठमके दुरुस्त करताना अचानक गॅस सिलेंडर लिक झाल्याने आगीचा भडका उडाला. या भडक्यात 1) योगेश गोपाळ ठमके वय 48 वर्षे रा.आंगर आळी 2) विलास विठु जोशी वय 45 वर्षे व 3) दिनेश मंगेश म्हाप्रळकर वय 17 वर्षे दोन्हीही रा. खडकआळी हे तिघे भाजल्याने त्यांचे अंगावरील चामडी निघून गंभीर जखमी झाले.

सर्व जखमींना नागोठणे प्राथमिक केंद्रात प्रथोमोपचार करून विलास जोशी व मंगेश म्हाप्रळकर यांना पुढील उपचारासाठी नागोठणे येथील कोकणे रुग्णालय तर योगेश ठमके याला पुढील उपचारासाठी अलिबाग येथील जिल्हा रुग्णालयात रवाना करण्यात आले.

यावेळी विलास जोशी यांनी प्रसंगावधान राखत गॅस बंद केल्याने मोठा अनर्थ टळला असून आगीची खबर मिळताच खडक आळीतील तरुण व ग्रामस्थांनी मोठ्या सीताफीने आगीवर नियंत्रण मिळविले.

या आगीमध्ये घरातील घरगुती सामान डेकोरेशनसाठीचे मंडपचे कापडी व ईलेक्ट्रीकल सामान मोठ्या प्रमाणात जळून साधारण 2 लाख 30 हजार रुपयांचे नुकसान झाले आहे.सदरील घटनेची नोंद पोलीस ठाण्यात झाली असून पुढील तपास सहा.पो.नि.सचिन कुलकर्णी यांच्या मार्गदर्शनाखाली महिला पोलिस हे.कॉ.दया पाटील करीत आहेत.