गणपती बाप्पा मोरया… पुढल्या वर्षी लवकर या ..च्या जयघोषात बाळसई येथिल पाच दिवसांच्या बाप्पांना भावपूर्ण निरोप

सुकेळी ( दिनेश ठमके ) :

गणपती बाप्पा मोरया.. पुढल्या वर्षी लवकर या ..च्या जयघोषात नागोठणे जवळच असलेल्या बाळसई येथिल पाच दिवसांच्या आपल्या लाडक्या बाप्पांना सर्वच गणेश भक्तांनी भावपूर्ण अंत:करणाने निरोप दिला.शनि. ( दि.७ ) सप्टेंबर रोजी आपल्या लाडक्या बाप्पाचे मोठ्या थाटामाटात आगमन झाले होते. नागोठणे विभागासह बाळसई, वाकण, पाटणसई, वांगणी, आमडोशी, सुकेळी परिसरातील गणेश भक्तांनी पाच दिवसांच्या आपल्या लाडक्या बाप्पाला तसेच गौरींना निरोप दिला.

बाळसई गावातील जवळपास १०० ते ११० गणपती बाप्पांची सायं. ५ वाजण्याच्या सुमारास फटाक्यांच्या आतषबाजीत विसर्जन मिरवणुक काढण्यात आली. यावेळी ढोल – ताशांच्या गजरात सर्वच भक्तगण नाचण्यामध्ये दंग झाले होते. गणपती बाप्पा मोरया…पुढल्या वर्षी लवकर या… एक दोन तीन चार गणपतीचा‌ जयजयकार अशा नामघोषाने संपुर्ण परिसर दणाणून गेला होता.

सायं . ६.३० वाजण्याच्या सुमारास अंबा नदि घाटावर सामुदायिक आरती‌ झाल्यानंतर सर्वच गणेश भक्तांनी आपल्या लाडक्या बाप्पाला निरोप दिला. बाळसई गावचे अध्यक्ष मधुकर ठमके यांच्या मार्गदर्शनाखाली बाळसई गावातील गणपती – गौरी विसर्जनाचा सोहळा उत्साहात पार पडला.