खारपाडा टोल नाक्याजवळ उभ्या ट्रकमधून डिझेल चोरी, चालकाला धमकावून मोबाईलसह काढून घेतली रोख रक्कम

पनवेल (संजय कदम) :

पनवेल तालुक्यातील खारपाडा टोल नाक्याजवळ शिव हॉटेलसमोरील पार्कींगमध्ये उभ्या करून ठेवलेल्या ट्रकमधून अज्ञात चोरट्याने 200 लीटर डिझेलची चोरी केली.

यावेळी चालकाने त्यांना हटकले असता त्याला धमकावून त्याच्याकडील मोबाईल व रोख रक्कम जबरीने चोरी करून ते पसार झाल्याने याबाबतची तक्रार पनवेल तालुका पोलीस ठाण्यात करण्यात आली आहे.

बलवान गौतम (38 रा.उत्तर प्रदेश) याने त्याच्या ताब्यातील ट्रक शिव हॉटेलसमोरील पार्कींगमध्ये उभा करून ठेवला होता व तो झोपला असताना 4 अनोळखी इसमांनी त्याच्या ट्रकमधील 200 लीटर डिझेलची चोरी केली.

यावेळी त्याने हटकले असता त्याला चौकडीने धमकावून त्याच्याकडील मोबाईल फोन व 700 रुपये रोख रक्कम काढून घेवून ते पसार झाले आहेत.