कोकणनामा प्रतिष्ठानच्या राज्यस्तरीय पुरस्कारानं मान्यवरांचा सन्मान

अलिबाग ( राजेश बाष्टे ) : लायन्स हेल्थ फाऊंडेशन अलिबागच्या माध्यमातून चोंढी येथील डोळ्यांच्या हाॅस्पिटलच्या माध्यमातून नेत्रविकारांशी निकराचा लढा सुरु आहे. लवकरच सोगाव येथे गोरगरीबांसाठी सुपर स्पेशालिटी आय हाॅस्पिटल उभारले जाणार आहे, तेथे डायलेसीस सेंटर, डायबेटिस सेंटर अशी विविध सेंटर्स असणार आहेत, अशी माहिती कोकणनामा प्रतिष्ठानच्या राज्यस्तरीय पुरस्कार वितरण प्रसंगी पुरस्कारांच्या मानकऱ्यांचे अभिनंदन करताना लायन्स हेल्थ फाऊंडेशन, अलिबागचे उपाध्यक्ष, उद्योजक नितीन अधिकारी यांनी दिली.

कोकणनामा प्रतिष्ठान, अलिबागतर्फे साहित्यिक-पत्रकार उमाजी केळुसकर यांच्या वाढदिवसाचे औचित्य साधून २०२३ या वर्षासाठी राज्यस्तरीय महाराष्ट्र हाॅटेल सम्राट पुरस्कार आणि कोकण भूषण पुरस्कार पुरस्कार वितरण समारंभ शनिवार, ५ आॅगस्ट रोजी अलिबागेतील हाॅटेल गुरुप्रसादच्या सभागृहात आयोजित करण्यात आला होता.

या पुरस्कार वितरण समारंभासाठी लायन्स हेल्थ फाऊंडेशन, अलिबागचे उपाध्यक्ष, उद्योजक नितीन अधिकारी, नायब तहसीलदार, विभागीय आयुक्त कार्यालय कोकणचे श्रीकांत कवळे, रायगड जिल्हा मराठी पत्रकार संघाचे उपाध्यक्ष नागेश कुळकर्णी, नाट्य-चित्रपट अभिनेते, साहित्यिक शरद कोरडे, पत्रकार-साहित्यिक उमाजी केळुसकर, योगिता केळुसकर, आरती डोंगरे आदी मान्यवर उपस्थित होते.

याप्रसंगी महाराष्ट्र हाॅटेल सम्राट या पुरस्काराने शून्यातून आपले हाटेल विश्व निर्माण करणारे हाॅटेल गुरुप्रसादचे मालक यशवंत हरेर, ग्रामीण भागातून येऊनही महाराष्ट्राच्या साहित्य क्षेत्रात झळकणारे साहित्यिक, आगरी सामाजिक संस्था, अलिबागचे अध्यक्ष कैलास पिंगळे आणि महाराष्ट्र पातळीवर आपल्या संघटन कौशल्यामुळे सुप्रसिद्ध असलेले माॅर्निंग वाॅक ग्रुप, आंबेपूर-पेझारीचे अध्यक्ष, पत्रकार प्रकाश नागू म्हात्रे या दोघांना कोकण भूषण पुरस्काराने सन्मानित करण्यात आले.

आरोग्याच्या क्षेत्रात महत्वाची कामगिरी बजावणाऱ्या माॅर्निंग वाॅक ग्रुप, आंबेपूर-पेझारीचाही विशेष सत्कार करण्यात आला. हा पुरस्कार माॅर्निंग वाॅक ग्रुपचे कार्याध्यक्ष मोहन मंचुके, सचिव जी.सी.पाटील, उपाध्यक्ष अनिल पाटील आणि इतर पदाधिकारी, सदस्यांनी स्वीकारला.
प्रारंभी सर्व मान्यवरांची भाषणे झाली. तसेच पुरस्कारप्राप्त मान्यवरांनी आपले मनोगत व्यक्त केले. याच कार्यक्रमात कवी नंदू तळकर यांनी लायन्स हेल्थ फाऊंडेशनला २५ हजार रुपयांची देणगी जाहीर केली. या संपूर्ण कार्यक्रमाचे सूत्रसंचालन धनंजय भगत यांनी केले.