किल्ले रायगडावरील कपोलकल्पित वाघ्या कुत्र्याची समाधी हटवा – संभाजीराजेंचं सीएम यांना पत्र; वाघ्याच्या अस्तित्वावर संशय

PEN न्यूज ऑनलाइन टीम : 

रायगडावरील वाघ्या कुत्र्याची समाधी हटवावी, अशी मागणी संभाजीराजे छत्रपती यांनी केली आहे. त्यांनी महाराष्ट्र सरकारला पत्र लिहून ३१ मे २०२५ पर्यंत हे अतिक्रमण काढण्याची विनंती केली आहे. रायगड हा छत्रपती शिवाजी महाराजांचा राज्याभिषेक झालेला आणि त्यांची समाधी असलेला ऐतिहासिक किल्ला आहे. मात्र, महाराजांच्या समाधीशेजारी वाघ्या नावाच्या कुत्र्याची समाधी उभारण्यात आली आहे.

 छत्रपती संभाजीराजे यांनी आपल्या पत्रात सांगितले की, शिवकालीन इतिहासात वाघ्या कुत्र्याचा कोणताही उल्लेख नाही आणि भारतीय पुरातत्व विभागाकडेही त्याबाबत कोणतेही पुरावे नाहीत. त्यामुळे अशा कपोलकल्पित समाधीला ऐतिहासिक मान्यता देणे चुकीचे आहे. शिवप्रेमी आणि इतिहास अभ्यासक याआधीही ही समाधी हटवण्याची मागणी करत आले आहेत, मात्र त्यावर अद्याप कोणतीही ठोस कारवाई झालेली नाही.

वाघ्या कुत्र्याची कथा – इतिहास की कल्पना?

इतिहासकार इंद्रजीत सावंत यांनी स्पष्ट सांगितले की, वाघ्या कुत्र्याची कथा ऐतिहासिक नसून, ती नाटकातून जन्माला आलेली आहे. छत्रपती शिवाजी महाराजांच्या संपूर्ण जीवनचरित्रात वाघ्या कुत्र्याचा कुठेही उल्लेख नाही.

कथा कशी निर्माण झाली?

राम गणेश गडकरी यांनी ‘राजसंन्यास’ हे नाटक लिहिले होते. या नाटकाच्या अर्पण पत्रिकेत प्रथमच वाघ्या कुत्र्याचा उल्लेख दिसतो. त्यानंतर ही कथा प्रसिद्ध होत गेली आणि पुढे वाघ्या कुत्र्याच्या समाधीचा समज पसरला.

वाघ्या कुत्र्याच्या समाधीचा वाद आणि सरकारी भूमिकेची प्रतीक्षा

संभाजीराजे छत्रपती यांच्या मागणीमुळे पुन्हा एकदा हा विषय चर्चेत आला आहे. शिवप्रेमी अनेक वर्षांपासून ही समाधी हटवण्याची मागणी करत आहेत, मात्र अद्याप कोणतीही कारवाई झालेली नाही. आता सरकार यावर कोणती भूमिका घेते हे पाहणे महत्त्वाचे ठरणार आहे.

संभाजीराजे छत्रपती यांच्या मते, वाघ्या कुत्र्याची समाधी म्हणजे रायगडावरील अतिक्रमण आहे आणि ती कायमस्वरूपी हटवली पाहिजे. ३१ मे २०२५ पर्यंत ही समाधी हटवावी, अशी मागणी त्यांनी मुख्यमंत्री यांच्याकडे केली आहे.

सरकार या मागणीवर काय निर्णय घेते आणि शिवप्रेमींना योग्य तो न्याय मिळतो का, हे पाहण्यासाठी सर्वांचे लक्ष लागले आहे.