PEN न्यूज ऑनलाइन टीम :
येणाऱ्या निवडणुकीच्या पार्श्वभूमीवर शहरात कोणताही अनुचित प्रकार घडू नये आणि कायदा व सुव्यवस्था अबाधित राहावी यासाठी पेण पोलीस ठाण्याकडून मुख्य मार्गांवरून रूट मार्चचे आयोजन करण्यात आले. या रूट मार्चला डी.वाय.एस.पी. शिवाजी फडतरे यांच्या नेतृत्वाखाली सुरुवात झाली.
दरम्यान, रूट मार्चची सुरुवात डी.वाय.एस.पी. ऑफिस येथून झाली आणि यामध्ये पेण शहरातील प्रमुख ठिकाणांचा समावेश होता. मार्गात डॉ. बाबासाहेब आंबेडकर चौक, छत्रपती शिवाजी महाराज चौक, जामा मस्जिद, खान मोहल्ला, महावीर मार्ग, खाटीक मोहल्ला, पांका पाटील चौक, राजू पोटे मार्ग, एस.टी. स्टँड, नगरपालिका चौक असे विविध ठिकाणांवरून रूट मार्च काढण्यात आला. शेवटी डी.वाय.एस.पी. कार्यालय आवारात रूट मार्चचा समारोप करण्यात आला.
यावेळी रूट मार्चमध्ये डी.वाय.एस.पी. शिवाजी फडतरे, पोलीस निरीक्षक संदीप बागुल, सहाय्यक पोलीस निरीक्षक पाटील, तसेच महिला उपपोलीस निरीक्षक शिल्पा वेंगुर्लेकर यांचा समावेश होता. या व्यतिरिक्त, राखीव पोलीस दलाचे 52 जवानही रूट मार्चमध्ये सहभागी झाले होते.
शहरातील नागरिकांमध्ये सुरक्षिततेचा विश्वास निर्माण करणे आणि निवडणुकीच्या काळात कायदा व सुव्यवस्था अबाधित ठेवणे हा या रूट मार्चचा मुख्य उद्देश होता. निवडणूक काळात कोणतीही अव्यवस्था निर्माण होऊ नये म्हणून पोलीस यंत्रणा सज्ज असल्याचे यावेळी दिसून आले.
