ओले काजुगर व कैरी विक्रीमुळे आदिवासींना मिळतोय रोजगार

सुकेळी (दिनेश ठमके) :

ओले काजुगर व कच्च्या कै-यांचे नाव घेतले की सगळ्यांच्याच जिभेला पाणी सुटते. उन्हाळा सुरू होताच नागोठणे, पाली, कोलाड या ठिकाणी मोठ्या प्रमाणात रानमेवा हा बाजारात दाखल झाला आहे. तसेच वाकण -पाली मार्गावर देखिल आजुबाजूच्या परिसरातील आदिवासी महिला ओल्या काजुच्या बिया व कच्च्या कै-या विक्रीसाठी बसत असल्याचे चित्र पहावयास मिळत आहे.

सुक्या काजुच्या बियांपेक्षा ओल्या काजुगरांना जास्त भाव मिळत आहे. तब्बल २५० ते ३०० रुपये शेकड्याने हे काजुगर मिळत आहेत. जरी किमंत जास्त असली तरी पहिल्या हंगामाच्या काजुच्या बिया खाण्यासाठी खवय्यांची मोठी लगबग सुरू आहे. चविष्ट व पौष्टिक असलेल्या ओल्या काजुच्या बियांचा अजुन पाहीजेत तसा हंगाम सुरु झाला नाही. पंरतु सध्या सुरू असलेल्या पहिल्या हंगामातील ओल्या काजुच्या बियांणा व कच्च्या कै-यांना चांगल्या प्रकारे भाव मिळत असल्याने आदिवासी लोकांना ही यातुन चांगले उत्पन्न मिळत असुन त्यांच्या चेहऱ्यावर आनंदाचे वातावरण दिसून येत आहे. काही ठिकाणी या बिया शेकड्याने मिळतात तर काही ठिकाणी त्या वाट्यावर देखिल मिळाल्या जातात.

त्यामुळे चविष्ट, रुचकर असलेल्या काजुगरांना मुंबई, पनवेल, पुणे आदी ठिकाणी मोठ्या प्रमाणात मागणी असल्याचे वाकण – पाली मार्गावर काजुगर विक्रीसाठी बसलेल्या आदिवासी महिलांनी सांगितले. तसेच ओल्या काजुगरांना मिळणारा जास्त भाव आणी वाढत्या मागणीमुळे आदिवासी महिलांनी ओले काजुगर विक्रीला मोठ्या प्रमाणात भर दिला आहे.