उज्ज्वल भविष्य मैत्रेयी ग्रंथालय चं अलिबाग येथे उद्घाटन

अलिबाग (अमुलकुमार जैन) : 

उज्ज्वल भविष्य सामाजिक संस्थेच्या तृतीय वर्धापन दिनानिमित्त अलिबाग येथील उज्ज्वल भविष्य मैत्रेयी ग्रंथालयाचे उद्घाटन ज्येष्ठ साहित्यिक रमेश धनावडे आणि तेजस्विनी फाउंडेशनच्या अध्यक्षा ॲड. जीविता पाटील यांच्या हस्ते करण्यात आले.

धनावडे यांनी ग्रंथालयांचे ऐतिहासिक महत्त्व सांगताना नालंदा विद्यापीठाच्या समृद्ध ग्रंथालयाचा उल्लेख केला. तसेच, ग्रंथालये लोकशाही मूल्ये जपणाऱ्या संस्था असल्याचे सांगितले. या कार्यक्रमाला माजी नगराध्यक्ष प्रशांत नाईक, डॉ. नितीन गांधी, सुप्रिया जेधे, सचिन गोंधळी, रेखा पाटील आदी मान्यवर उपस्थित होते.

ज्येष्ठ समाजसेविका जीविता पाटील यांनी तरुणांनी मोबाईलचा वापर कमी करून ग्रंथालयाचा अधिकाधिक उपयोग करून ज्ञान वाढवावे, असे आवाहन केले. धनावडे यांनी ग्रंथांचा संदर्भ घेऊन लेखन करण्याचे महत्त्व स्पष्ट करत प्रत्येकाने ग्रंथालय सदस्यत्व घेण्याचे आवाहन केले.