आदर्श शिक्षक व सामाजिक कार्यकर्ते वसंत पिंगळे यांचं निधन

पेण (सुदर्शन शेळके) : 

कुर्डूस गावातील आदर्श शिक्षक, सामाजिक कार्यकर्ते आणि शैक्षणिक क्षेत्रात महत्त्वपूर्ण योगदान देणारे वसंत पोसू पिंगळे यांचे 1 मार्च 2025 रोजी त्यांच्या राहत्या घरी अल्पशा आजाराने निधन झाले. ते 83 वर्षांचे होते. शेतकरी कामगार पक्षाच्या निष्ठावंत कार्यकर्त्यांपैकी एक असलेल्या पिंगळे यांनी स्वर्गीय लोकनेते दत्ता पाटील तथा दादा आणि स्वर्गीय भाऊ प्रभाकर पाटील यांच्या सोबत राहून खारेपाटी व ग्रामीण भागाच्या विकासासाठी कार्य केले.

वसंत पोसू पिंगळे यांचा कुर्डूस गावाच्या शैक्षणिक आणि सामाजिक विकासात मोठा वाटा होता. कुर्डूस हायस्कूलचा निकाल शून्य टक्क्यांवरून 75% पर्यंत वाढवण्यास त्यांनी मोलाचे योगदान दिले. शाळेच्या इमारतीच्या बांधकामात आणि अनुदान मिळवण्यातही त्यांचा सिंहाचा वाटा होता. त्यांच्या योगदानामुळेच त्यांना शाळेचे चेअरमन म्हणून जबाबदारी देण्यात आली होती. शिक्षणासोबतच त्यांनी सामाजिक कार्यातही मोठी भूमिका बजावली. अलिबाग तालुका शिक्षक संघटनेचे अध्यक्ष, कुर्डूस ग्रामपंचायत तंटामुक्ती संघटनेचे अध्यक्ष, मातृ -छाया क्रीडा मंडळाचे अध्यक्ष, खरेदी – विक्री संघ कुर्डुस विभागाचे सदस्य, ज्येष्ठ नागरिक संघटना कुर्डूस विभागाचे अध्यक्ष यांसह अनेक संस्थांमध्ये त्यांनी कार्य केले.

त्यांच्या निधनाने शेतकरी कामगार पक्षासह संपूर्ण अलिबाग तालुक्यात शोककळा पसरली आहे. त्यांच्या अंत्यदर्शनासाठी आणि अंत्यसंस्कारासाठी अनेक राजकीय, सामाजिक आणि शैक्षणिक क्षेत्रातील मान्यवर उपस्थित होते. त्यांच्या पश्चात पत्नी, मुले, मुली, जावई, नातवंडे असा मोठा परिवार आहे. त्यांच्या जाण्याने अनेक विद्यार्थी, ग्रामस्थ आणि समाजातील लोक भावनिक झाले असून त्यांना भावपूर्ण श्रद्धांजली वाहिली जात आहे.