आंबेनळी घाट वाहतुकीसाठी 15 दिवस बंद ठेवण्यासोबत दर 15 दिवसांनी स्वयंस्पष्ट अहवालानंतर होणार पुनर्निर्णय

पोलादपूर ( शैलेश पालकर ) : रायगड जिल्ह्यातील अतिवृष्टीच्या पार्श्वभूमीवर पोलादपूर-महाबळेश्वर आंबेनळी घाट रस्त्यावरील दुर्घटना टाळण्यासाठी जिल्हाधिकारी डॉ. योगेश म्हसे यांनी पुढील 15 दिवसांकरिता पोलादपूर-महाबळेश्वर हा आंबेनळी घाटरस्ता सर्व प्रकारच्या वाहतूकीकरिता बंद करण्याची अधिसूचना प्रसिध्द जारी केली आहे.

अपर पोलीस अधीक्षक रायगड-अलिबाग यांच्या पत्रानुसार आंबेनळी घाट रस्ता हा अरूंद व घाट वळणाचा असल्याने रस्त्याचे बाजूला असणारा डोंगरकडा हा या भागात पडणाऱ्या पावसामुळे भूस्खलन होवून डोंगरावरील माती व मोठमोठे दगड रस्त्यावर आल्याने तसेच रस्त्याच्या दुसऱ्या बाजूला खोल दरी असल्याने हा घाट रस्ता वाहतुकीस धोकादायक असल्याचे प्रथमदर्शनी दिसत आहे. कोकण व महाबळेश्वरला जोडणारा पर्यटनाच्या दृष्टीने अत्यंत महत्त्वाचा असलेला हा आंबेनळी घाट आहे.

या रस्त्यावरून वाहतुक सुरू ठेवल्यास नागरिकांच्या सुरक्षिततेचा प्रश्न उद्भवून मोठया प्रमाणांत जिवित व वित्तीय हानी होण्याची दाट शक्यता आहे. त्या कारणास्तव हा रस्ता बंद करण्यात येऊन, पर्यायी रस्ता पोलादपूर खेड-चिपळूण-पाटण- कराड-कोल्हापूर तसेच पाटणकडून सातारामार्गे पुण्याकडे असा पर्यायी मार्ग आहेत, असे अभिप्राय सादर केले आहेत.

या पार्श्वभूमीवर उपविभागीय दंडाधिकारी महाड डॉ.ज्ञानोबा बाणापुरे यांनी केलेल्या विनंतीनुसार जिल्ह्यातील अतिवृष्टीच्या अनुषंगाने पोलादपूर महाबळेश्वर या आंबेनळी घाटरस्त्यावरील कोणतीही दुर्घटना टाळण्याच्या दृष्टीने जिल्हाधिकारी डॉ.योगेश म्हसे यांनी या अधिसूचनेच्या दिनांक 28 जुलैपासून ते पुढील 15 दिवसांकरिता पोलादपूर-महाबळेश्वर हा आंबेनळी घाटातून जाणारा रस्ता सर्व प्रकारच्या वाहतूकीकरिता बंद ठेवण्याचा आदेश जारी केला आहे.

पोलादपूर महाबळेश्वर हा आंबेनळी घाटरस्ता सद्य:स्थितीत सुरक्षिततेच्या दृष्टिकोनातून वाहतुकीकरीता पूर्ण बंद करण्याबाबत तसेच त्याबाबत दर 15 दिवसांनी आढावा घेवून घाट रस्ता बंद ठेवण्याबाबत निर्णय घेणे योग्य राहील अशी विनंती केली होती. त्याअनुषंगाने या कार्यालया कडील दि.28 जुलै 2023 रोजीच्या अधिसुचनेनुसार पुढील 15दिवसांकरीता पोलादपूर महाबळेश्वर (आंबेनळी घाट) रस्ता सर्व प्रकारच्या वाहतूकीकरीता बंद करण्यात आलेला आहे. प्रकरणी पाऊस, भुस्खलन, दरड कोसळणे इत्यादी परिस्थितीबाबत पोलादपूर महाबळेश्वर या आंबेनळी घाटातीलवाहतुकीचा दर 15 दिवसांनी सविस्तर आढावा घेण्यात यावा व त्याअनुषंगाने सदर घाटरस्ता बंद ठेवण्याबाबत आपल्याकडील स्वयंस्पष्ट अहवाल दर 15 दिवसांनी या कार्यालयाकडे सादर करावा असे आदेश देण्यात आले आहेत.