PEN न्यूज ऑनलाइन टीम :
महाराष्ट्र राज्य मराठी पत्रकार संघ पेण व नॅशनल कम्प्युटर पेण यांच्या संयुक्त विद्यमाने सामाजिक बांधिलकीच्या भावनेतून आज बुधवार दिनांक 26 फेब्रुवारी रोजी महाशिवरात्री उत्सव निमित्त पेण अहिल्या मंडळ आणि तरणखोप अहिल्या मंडळ वृद्धाश्रमातील ज्येष्ठ नागरिकांना फळ आहाराचे वाटप करण्यात आले. या उपक्रमामुळे वृद्धाश्रमातील नागरिकांना आरोग्यदायी आहार मिळाला आणि त्यांच्यासोबत काही आनंदाचे क्षण देखील घालवण्यात आले.
या कार्यक्रमात पत्रकार स्वप्नील पाटील, किरण बांधनकर, गणेश पाटील, प्रशांत पोतदार, राजेश प्रधान, रूपेश गोडीवले, सुदर्शन शेळके व नॅशनल कम्प्युटरच्या संचालिका स्मिता सुदर्शन शेळके तसेच निवृत्त शिक्षक सी आर म्हात्रे (सर), समीर घायतळे उपस्थित होते. उपस्थित मान्यवरांनी वृद्धाश्रमातील रहिवाशांशी संवाद साधून त्यांच्या प्रकृतीची विचारपूस केली. यावेळी वृद्धांनी आपल्या आठवणी सांगत समाधान व्यक्त केले. हा उपक्रम वृद्धांना मानसिक आधार देणारा ठरला.
समाजातील वंचित आणि ज्येष्ठ नागरिकांसाठी असे उपक्रम नियमित घेतले जावेत, अशी भावना उपस्थित मान्यवरांनी व्यक्त केली. महाराष्ट्र राज्य मराठी पत्रकार संघ व नॅशनल कम्प्युटर यांच्यातर्फे भविष्यातही सामाजिक कार्य करत राहण्याचा संकल्प यावेळी करण्यात आला.
