
पोलादपूर ( शैलेश पालकर ) :
मुंबई-गोवा महामार्ग क्रमांक 66 वरील लोहारमाळ येथील पेट्रोल पंपावर काम करणाऱ्या तरुणीवर खोटे फोटो दाखवून शारीरिक शोषण केल्याच्या गंभीर प्रकरणात पोलादपूर पोलीस ठाण्यात पोक्सो अंतर्गत गुन्हा दाखल करण्यात आला आहे. महाड उपविभागीय पोलीस अधिकारी शंकर काळे यांच्या मार्गदर्शनाखाली पोलिसांनी ही कारवाई केली.
या गुन्हयामध्ये पिडीत तरूणी अल्पवयीन असल्याचे माहित असूनही ऑक्टोबर 2022 ते 21 सप्टेंबर 2024 सकाळी साडेनऊच्या सुमारास पिडीत तरूणीच्या घरामध्ये आरोपीत तरूणांनी तिच्या मनाविरूध्द तिला मारहाण व दमदाटी करून एडीट केलेले खोटे फोटो दाखवून वेळोवेळी जबरदस्तीने शारिरीक संबंध ठेवले म्हणून शनिवारी मध्यरात्री 21 सप्टेंबर 2024 रोजी रात्री 11 वाजून 26 मिनीटांनी पोलादपूर पोलीस ठाण्यामध्ये पिडीत तरूणीने (सध्याचे वय 19) दिलेल्या तक्रारीनुसार गुन्हा दाखल करण्यात आला.
यावेळी पोलादपूर पोलीस ठाण्याचा अतिरिक्त कार्यभार पाहणारे प्रभारी सहायक पोलीस निरिक्षक जीवन माने यांच्या मार्गदर्शनाखाली सहायक फौजदार जागडे यांनी दखलपात्र गुन्हा र.नं. 81-2024 नुसार भारतीय न्याय संहिता 64, 115(2), 3(5),333, 351(2), 352,64(एम) 74, 74(3) बालकांचे लैंगिक अपराधापासून संरक्षण अधिनियम 2012चे 4, 6, 8, 12, 17 प्रमाणे गुन्हा दाखल करण्यात आला आहे. याप्रकरणी महाड येथील डीवायएसपी शंकर काळे यांनी गुन्हा दाखल करण्यासंदर्भात पोलादपूर पोलीसांना मार्गदर्शन केले. लोहारमाळ येथील या घटनेनंतर पोलादपूर तालुक्यात होत असलेल्या चर्चेमध्ये दुसराच विषय चघळला जात असल्याचे पोलादपूर पोलीस ठाण्यात दाखल गुन्ह्याच्या डायरी रजिस्टरमुळे स्पष्ट झाले आहे.