अलिबाग विधानसभा मतदासंघातील कोणत्याही उमेदवाराला मनसेचा पाठिंबा नाही

अलिबाग ( अमुलकुमार जैन ) : 

रायगड जिल्ह्यातील विधानसभा निवडणुकीत चर्चेत आलेल्या अलिबाग विधानसभा निवडणुकीतील कोणत्याही उमेदवाराला महाराष्ट्र नव निर्माण सेनेचा पाठिंबा नसल्याचे जिल्हा उपाध्यक्ष शैलेश खोत यांनी आमच्या प्रतिनिधीशी बोलताना सांगितले आहे.

तसेच त्यांनी याबाबत एक पत्रक देखील प्रसिद्ध केले आहेत
रायगड जिल्ह्यातील अलिबाग मुरुड रोहा विधान सभा मतदार संघाचे महायुतीचे शिंदे गटाचे उमेदवार महेंद्र दळवी यांना महाराष्ट्र नव निर्माण सेनेचा पाठिंबा असल्याची चर्चा ही सुरू असून मनसेचे ज्येष्ठ नेते तथा माजी राज्यमंत्री बाळा नांदगावकर यांची एक व्हिडिओ क्लिप सर्वत्र पसरवून मनसे कार्यकर्ते आणि नागरिकांमध्ये संभ्रम निर्माण केला जाण्याचा प्रयत्न केला जात आहे.

याबाबत अधिक माहिती देताना मनसे जिल्हाउपाध्यक्ष शैलेश खोत यांनी सांगितले की, मनसे नेते बाळा नांदगावकर यांची प्रसार माध्यमांमध्ये अलिबाग मुरुड विधानसभेबाबत व्हायरल असलेली एक व्हिडिओ क्लिप ही काही लोकांकडून चुकीची माहिती देवून ती व्हिडीओ बनवण्यात आली आहे, आणि ती अलिबाग विधान सभा क्षेत्रात विविध सोशल मीडियाचा माध्यमद्वारे पसरवून संभ्रम निर्माण केला जात असल्याची माहिती मिळताच यासंदर्भात मनसेचे जिल्हाध्यक्ष जितेंद्र पाटील आणि जिल्ह्यातील पदाधिकारी यानी अध्यक्ष राज ठाकरे यांच्याशी चर्चा केली आणि त्यांच्या चर्चेनंतर आणि आदेशानुसार महाराष्ट्र नवनिर्माण सेनेचा अलिबाग-मुरुड विधानसभेकरिता कोणत्याही पक्षाला पाठिंबा नाही आहे. असे जाहीर केले असल्याचे मनसे जिल्हा उपाध्यक्ष शैलेश खोत यांनी सांगितले.