सोगाव (अब्दुल सोगावकर) :
अलिबाग तालुक्यातील सर्वात जास्त प्रमाणात रहदारीचा व वाहनांची सतत वर्दळीच्या असलेल्या अलिबाग रेवस मार्गावर बुधवार दि. २ एप्रिल रोजी दुपारच्या वेळी दुचाकी व चारचाकी वाहनामध्ये अपघात होऊन दुचाकी चालक गंभीर जखमी झाला आहे.
याबाबत पोलिसांनी थोडक्यात दिलेली माहिती अशी की, वरील दिवशी दुपारच्या वेळी दुचाकी चालक अलिबाग रेवस मार्गावरून अलिबाग बाजूकडून रेवस बाजूला जात असताना रेवस बाजूकडून अलिबागकडे येणाऱ्या चारचाकी या वाहनामध्ये थळ ग्रामपंचायत हद्दीतील वायशेत जवळ भररस्त्यात समोरासमोर भीषण अपघात झाला.
या अपघातात दुचाकी चालक केतन भगत(अंदाजे वय ३५), रा. झिराड, ता. अलिबाग हा गंभीर जखमी झाला. जखमी अवस्थेत असलेल्या दुचाकी चालकाला स्थानिक वाहनचालक व नागरिकांनी अधिक उपचारासाठी जिल्हा रुग्णालयात दाखल केले, मात्र गंभीर जखमी झालेल्या दुचाकी चालकावर प्राथमिक उपचार करून त्यास पुढील अधिक उपचारासाठी मुंबई येथील रुग्णालयात हलविण्यात आले आहे. याबाबत अधिक तपास अलिबाग पोलीस करीत आहेत.
