अलिबाग येथे पगार देण्यास टाळाटाळ करीत असलेल्या नादब्रह्म इडली व कारिया इलेक्ट्रॉनिक्सचे शटर बंद करीत केली कारवाईची मागणी

अलिबाग ( अमुलकुमार जैन ) :

महाराष्ट्र नव निर्माण सेनेच्या पदाधिकाऱ्यांनी रायगड जिल्ह्याच्या अलिबाग येथील भर बाजारात पगार मागण्यासाठी गेलेल्या अक्षया दळवी आणि तिचा सहकारी यांच्यावर जीवघेणा हल्ला करणाऱ्या नादब्रह्म इडली व कारिया इलेक्ट्रॉनिक्सचे राजेश कारिया यांच्या दुकानाचे शटर खाली खेचत त्याच्यावर कठोर कारवाई करण्याची मागणी अलिबाग पोलिस ठाण्याचे पोलिस निरीक्षक किशोर साळे यांच्याकडे केली आहे.

अलिबाग तालुक्यातील भाल येथील रहिवासी अक्षता दळवी (वय २२) व वायशेत येथील सायली मार्कील (वय २९) या दोघी जवळपास वर्षभरापासून नादब्रम्ह इडली दुकानाचे मालक राजेश कारिया यांच्याकडे कामाला होत्या. त्यांनी मिळून काम सोडण्याचे ठरविले होते. त्यानुसार त्यांनी कारिया यांना कळविले होते. मात्र दोन दिवसांनी सांगा असे त्यांच्याकडून सांगण्यात आले. त्याप्रमाणे अक्षता, सायली मार्किल व तिचा पती रविंद्र मार्किल हे त्यांच्यासोबत चर्चा करण्यासाठी गेले. यावेळी तरुणींनी कामाचा मोबदला मागितला.

मात्र कारिया यांनी पैसे पुढच्या वर्षी फेब्रुवारीमध्ये देण्यात येईल, असे सांगितले. यावरुन त्यांच्यात शाब्दिक मतभेद झाले. तसेच कारिया यांनी संतापाच्याभरात अक्षता व रविंद्र या दोघांवर धारदार चाकूने वार केले. यामध्ये त्यांना गंभीर दुखापत झाली. त्यांच्यावर जिल्हा रुग्णालयात औषधोपचार सुरु आहेत.

राजेश कारिया यांचे अलिबाग येथे नादब्रम्ह नावाचे इडली विक्रीचे दुकान आहे. या दुकानात सायली मार्कील व अक्षता दळवी गेल्या वर्षभरापासून कामाला आहेत. त्यांनी काम सोडून देण्याचा निर्णय घेतला. मंगळवारी दुपारी त्या कारिया यांना भेटल्या. तसेच पगाराची मागणी केली. कारीया यांनी फेब्रुवारी २०२५ मध्ये पगार देईन सांगत ते देण्यास टाळाटाळ केली. त्यावरून राजेश कारीया यांनी आपल्याकडे असलेल्या चाकूने हल्ला करून घटना स्थळावरून पलायन केले होते.

सदरची घटना ही महाराष्ट्र नव निर्माण सेनेचे पदाधिकारी यांना कळताच तालुका अध्यक्ष सहित त्यांचे सहकारी यांनी अलिबाग येथील जिल्हा रुग्णालयात जावून अक्षता दळवी व तिचा सहकारी यांची भेट त्यांच्याकडून सविस्तर माहिती घेतली. त्यानंतर मनसे अलिबाग आक्रमक होऊन राजेश कारियायांचे नादब्रह्म इडली व कारिया इलेक्ट्रॉनिक्सचे दुकाने बंद करीत शटर खाली करण्यास भाग पाडले. पोलीस निरीक्षक किशोर साळे यांची भेट घेऊन आरोपीवर होणाऱ्या कारवाईची माहिती घेतली.
स्थानिकांवर होणाऱ्या अन्यायाविरुद्ध वाचा फोडण्यासाठी मनसे नेहमीच तत्पर राहील असे अलिबाग मनसे अध्यक्ष सिद्धेश म्हात्रे यांनी सांगितले.