अलिबाग जे.एस.एम कॉलेजचे निवृत्त प्राध्यापक यांची पेण येथे धावत्या रेल्वेसमोर उडी मारून आत्महत्या

PEN न्यूज ऑनलाइन टीम :

अलिबाग येथील जे.एस.एम. कॉलेजचे निवृत्त प्राध्यापक आणि जन शिक्षण संस्था रायगडचे माजी अध्यक्ष अविनाश मनोहर ओक (वय ७०) यांनी बुधवार, दिनांक ५ रोजी दुपारी २ वाजताच्या सुमारास पेण रेल्वे स्टेशन येथे धावत्या रेल्वेसमोर उडी मारून आत्महत्या केली.

प्राध्यापक अविनाश ओक हे पेण येथील ‘आई डे केअर’ या संस्थेला भेट देण्यासाठी आले होते. भेटीनंतर ते स्वतःच्या गाडीने निघाले, मात्र पेण रेल्वे स्टेशनजवळ त्यांनी गाडी उभी केली आणि रेल्वे समोर उडी घेतली.

घटनेची माहिती मिळताच माजी खासदार किरीट सोमय्या तातडीने पेण उपजिल्हा रुग्णालयात पोहोचले. किरीट सोमय्या हे अविनाश ओक यांचे चुलत मेहुणे आहेत.

अविनाश ओक हे माणगाव येथील प्रसिद्ध वकील (आबा) मनोहर ओक यांचे चिरंजीव होते. ते अलिबाग येथील जे.एस.एम. कॉलेजमध्ये राज्यशास्त्र विषयाचे प्राध्यापक होते आणि अलिबाग येथे स्थायिक झाले होते. त्यांच्या अकस्मात निधनामुळे शिक्षण क्षेत्रात हळहळ व्यक्त केली जात आहे. त्यांच्या पार्थिवावर अलिबाग येथे अंत्यसंस्कार करण्यात आले.

आत्महत्येची सापडली चिठ्ठी 

प्राध्यापक अविनाश ओक यांच्या आत्महत्याची चिट्ठी मृत्यूनंतर घटनास्थळी पोलिसांना त्यांच्या शर्टाच्या खिशात  सापडली आहे. या चिट्ठीत ‘ मी आत्महत्या करत आहे मृत्यूस कोणासही जबाबदार धरू नये ‘  अशाप्रकारे लिहिलेली चिट्ठी सापडली आहे.