अलिबाग जिल्हा सामान्य रुग्णालयातील पाणी कुलरमध्ये अस्वच्छता; रुग्णांच्या आरोग्याला धोका

अलिबाग ( अमुलकुमार जैन ) : 

रायगड जिल्ह्यातील अलिबाग येथील जिल्हा सामान्य रुग्णालयात रोज हजारो रुग्णांवर विविध उपचार केले जात असतानाच रुग्णालयात येणाऱ्या रुग्णासाठी पिण्यासाठी असलेल्या पाण्याच्या कुलरमध्ये किडे, माती मिश्रित पाणी असल्याने रुग्णांना त्यापाण्यामुळे विविध प्रकारच्या साथीचे रोग उद्भवण्याची शक्यता नाकारता येत नाही.

अलिबाग येथील जिल्हा सामान्य रुग्णालयात बाह्य रुग्ण विभागात तसेच आंतर रुग्ण कक्षात येणाऱ्या रुग्ण आणि नातेवाईक यांच्या साठी पाण्याची व्यवस्था व्हावी यासाठी तळ मजल्यापासून प्रत्येक मजल्यावर पाण्याचे कुलर बसविण्यात आले आहेत. मात्र या कुलरची देखभाल करणे ही निंतात गरजेचे आहे. मात्र कुलरची अवस्था पाहता असता त्याची देखभाल होत नसावी अशी शंका उपस्थित होत आहे.

जिल्हा सामान्य रुग्णालयात असणाऱ्या कुलरच्या झाकणावर मातीचा थर तसेच कुलर मध्ये माती तसेच लहान लहान किडे पाण्यात दिसून आले आहे. तसेच कुलरच्या बाजूला देखील काही प्रमाणात कचरा असल्याचे दिसून आले आहे. सदर कुलर मधील पाणी पिल्यास त्या पासून त्यांना डेंग्यू, अतिसार सारखे रोग होण्याची शक्यता नाकारता येत नाही.

जिल्हा रुग्णालय प्रशासनाने याची त्वरित दखल घेवून कुलर स्वच्छ करावे अशी मागणी रुग्ण सहित नातेवाईक यांच्याकडून होत आहे.