अंडर १९ जिल्हा महिला क्रिकेट संघात माणगांवच्या मुलींची सरशी

माणगांव ( राम भोस्तेकर ) : 

१९ वर्षा खालील मुलींच्या रायगड जिल्हा क्रिकेट संघात माणगांवच्या एन.एस. क्रिकेट अकॅडमी मधुन प्रशिक्षण घेत असलेल्या कु. वेदिका तेटगुरे व कु. कनक यादव या दोघी तसेच फायटर क्रिकेट ॲकॅडमी मधुन प्रशिक्षण घेत असलेली कु. तनश्री सावंत या तिन्ही मुलींची जिल्हा संघात निवड करण्यात आली असल्याने माणगांवच्या या मुलींनी जिल्हा क्रिकेट संघात आघाडी मारली आहे.

नुकतेच जिल्ह्यातील १९ वर्षाखालील मुलींची निवड चाचणी झाली. या चाचणीसाठी संपूर्ण रायगड जिल्ह्यातूनच मुली उपस्थित होत्या. त्यामधून अंतिम संघात एन.एस. क्रिकेट ॲकॅडेमीची कु. वेदिका तेटगुरे व कु. कनक यादव तसेच फायटर क्रिकेट ॲकॅडेमीची तनश्री सावंत या तिन मुलींची निवड करण्यात आली असल्याची माहिती एन एस क्रिकेटचे प्रशिक्षक नयन शिंदे व फायटर क्रिकेट ॲकडमीचे प्रशिक्षक रोहित काळे यांनी दिली आहे. 

मुलींच्या क्रिकेट खेळासाठी घेतलेल्या विशेष प्रयत्नांना आज  सुयश आल्यामुळे प्रशिक्षक शिंदे व काळे यांनी कु. वेदिका,  कु. कनक व कु. तनश्री यांच्या खेळातील प्रशंसनीय प्रगती बाबत समाधान व्यक्त करीत त्यांचे खास अभिनंदन केले आहे. 

लवकरच रायगड जिल्ह्याचा हा संघ महाराष्ट्र क्रिकेट असोसिएशनच्या निमंत्रितांच्या विशेष स्पर्धेत खेळणार असल्याची माहीती देखील  या दोन्ही प्रशिक्षकांनी दिली, माणगांवच्या या तिन्ही अंडर १९ महिला क्रिकेटपटू मुलींचे माणगांवकर क्रिकेट प्रेमी व मित्र परिवारां-कडुन विशेष कौतुक होत आहे.